May Awa ang Diyos!

Click: (Readings for Second Sunday of Easter/Divine Mercy Sunday)

Matagumpay ang ating Panginoon! Maluwalhati Siyang nagpakita sa Kanyang mga alagad at pumasok sa kanilang silid kahit na nakakandado ito. Dala ng matagumpay nating Panginoon ang kapayapaan para sa Kanyang mga alagad na marahil ay takot at naubusan ng pag-asa sa mga nangyari sa tinuturing nilang Guro.

Sa kabila ng mga pagkukulang ng mga alagad Niya, may awa ang Diyos! Ipinagkaloob ni Jesus sa kanila ang Kanyang "hininga", ang Kanyang bagong buhay, ang Kanyang Espiritu. Kalakip nito ang kapangyarihang magpatawad ng kasalanan sa ngalan Niya. Kung paanong natamasa nila ang awa at pagpapatawad ni Jesus, sila naman ang ginawang tagapagbahagi ng awa at pagpapatawad ng Panginoon sa iba.

Kung noong bago Siya mamatay ay tinatag ni Jesus ang Banal na Eukaristiya, sa Kanyang Muling Pagkabuhay naman ay tinatag ni Jesus ang sakramento ng Kumpisal, ang sakramento ng Kanyang Awa. Sa sakramentong ito, sumasalok ang mga Apostol, at sa panahon ngayon, ang mga kaparian, mula sa 'di mauubos na Awa ni Jesus, mula sa mga merito ng pagdanak ng Dugo ni Jesus at ng Kanyang Kamatayan, at idinudulot nila sa atin ang kapatawarang bunga nito.

Ang tindi ng awa ni Jesus! Kapayapaan at kapatawaran ang dala Niya sa atin matapos gawin sa Kanya ng mundo ang pinakamalupit na kasamaan, matapos Siyang iwan ng mga Apostoles at itatwa ni Pedro! Sa krus, wala Siyang tinira sa sarili Niya. Nasaid para sa atin ang lahat ng Dugo at Tubig mula sa Kanya. All this dahil sa Kanyang awa sa atin at pagnanais Niyang iligtas tayo. Gaano man kalaking kasalanan ay mapapatawad ni Jesus, basta totoo tayong nagsisisi  at lumalapit sa sakramento ng Kumpisal. Wag nawa tayong matulad kay Santo Tomas Apostol na sa sobrang lungkot ay nawalan na ng pag-asa sa Muling Pagkabuhay. Buhay si Jesus at dahil doon, may pag-asa tayo na mabubuhay tayong muli mula sa pagkamatay sa kasalanan! May awa ang Diyos! Magtiwala lang tayo na kaya Niya tayong patawarin.

Gayunpaman, hinahamon tayo ng dakilang awa ni Jesus na magpursige sa kabutihan. Hindi tayo dapat maging lax sa ating buhay Kristiyano. Hindi porke't may awa ang Diyos ay hindi na rin tayo magsusumikap maging mabuti. Nariyan ang Kumpisal upang matamasa natin ang awa ng Diyos tuwing nadadapa tayo. Pero ang awa ng Diyos rin ang dapat magbigay-lakas sa atin na lumago sa pananampalataya at pagsasabuhay nito. Ang awa ng Diyos ang dapat maging sanggalang natin laban sa tukso na muling magkasala. Walang masama sa paulit-ulit na pangungumpisal. Ngunit dapat ay may paglago tayo sa bawat paglapit natin sa sakramentong ito, paglago "sa tulong ng mahal na grasya" at awa ni Jesus.

May awa ang Diyos! Nawa ang awa at kapayapaan ng Muling Nabuhay na Panginoon ay sumaatin, patawarin tayo at palakasin sa buhay Krsitiyano. At nawa'y suklian natin ng tiwala ang awa ng Diyos. Inihahain na sa atin ni Jesus ang lahat, lalo na sa mga banal na sakramento ng Kumpisal at Eukaristiya. Ang kulang na lang ay lumapit tayo sa Kanya, puno ng pananalig sa Panginoon at Diyos natin, tulad ng ginawa ni Santo Tomas Apostol. Magtiwala tayo, manalig at makikita natin Siya, makikita natin ang mga sugat Niya. Sa huli ay masasabi nga natin, "May awa ang Diyos!"

Indulgence Alert! May special indulgence na maaaring makamtan sa araw ng Divine Mercy Sunday. Ipinagkaloob ni Pope John Paul II ang plenary indulgence, under the usual conditions (Confession, Communion and Prayer for the Pope's intentions), sa mga makikiisa sa mga panalangin o debosyon in honor of Divine Mercy sa anumang simbahan o kapilya. Ipinagkakaloob din ito sa mga magdarasal ng Our Father, Creed at invocation sa Mahabaging si Jesus (halimbawa: Merciful Jesus, I trust in you!) sa harap ng exposed or reserved Blessed Sacrament.

Read more about the indulgence here: (Decree on indulgences attached to devotions in honor of Divine Mercy)

SEMANA SANTA: Martes Santo

Tatlong Apostoles ang highlighted sa ating Ebanghelyo ngayon: Si San Juan, si San Pedro at si Judas. Alam naman natin ang kanilang mga ginampanan sa Passion narrative ni Jesus.

Click: (Reading for Tuesday of Holy Week)

Si Juan ang tinuturing na beloved disciple. Sa Ebanghelyo ngayon ay makikita na tunay na malapit si Juan sa ating Panginoong Jesus. Inilalarawan siya na nakahilig sa dibdib ni Jesus, malapit sa Kanyang puso. Alam natin na hindi lang in terms of space or distance ang pagiging malapit si Juan kay Jesus. Malapit siya sa puso ni Jesus. Siya lamang ang Apostol na hindi umiwan kay Jesus hanggang sa kamatayan Niya. Narinig niya ang pagtibok ng Puso ni Jesus. Nasaksihan niya rin sa Kalbaryo kung paano tumibok ang pusong ito para sa sangkatauhan habang nakapako si Jesus sa krus. Nakita niya kung paanong nasaid ang dugo at kahit ang tubig sa Puso ni Jesus, mula sa buong katawan ng ating Panginoon.

Labis rin ang katapatang ipinakita ni San Juan kay Jesus, habang ipinapamalas ni Jesus ang dakilang pag-ibig Niya sa sangkatauhan sa Kanyang paghihirap. Katapatan at hindi pag-iwan kay Jesus ang tugon ni Juan sa pag-ibig ng ating Panginoon. Sa ating buhay, paano kaya natin tinutugunan ang pag-ibig ng Diyos? Nananatili ba tayo sa tabi Niya? Tuwing nagkakasala tayo ay iniiwan natin Siya. Tayo ang lumalayo sa Kanya.

Si Jesus at ang Kanyang Misteryo Paskal ay nasa Banal na Eukaristiya. Gaano tayo kadalas lumapit sa Kanya sa Banal na Sakramento? Tulad ni San Juan na sumandal sa Puso ni Jesus, sumandal rin nawa tayo sa Banal na Sakramento kung saan napakalapit natin kay Jesus! Sa Panginoong Jesus lamang  tayo makakakuha ng lakas upang maging matapat bilang mga Kristiyano. Lumapit nawa tayo sa Kanya at igalang Siya sa Banal na Eukaristiya.

Si Judas naman ay imahe ng pagtataksil para sa atin. Hindi lamang niya iniwan kundi ipinagkanulo pa si Jesus. At sa huli, sa halip na magbalik-loob ay pinili pa niyang magpakamatay, kaya't natapos ang buhay niya sa isa pang kasalanang mortal. Sa kwento ni Judas, nabibigyan tayo ng babala: ang pagsisisi sa kasalanan ay dapat pinapakita sa pagbabalik-loob, hindi sa paggawa pang muli ng kasalanan. Isang malaking insulto sa Diyos ang hindi pagkilala sa Kanyang awa.

Si San Pedro naman ay binalaan ni Jesus sa Ebanghelyo ngayon tungkol sa kanyang magiging kasalanan: ang pagtatwa sa Kanya. Ayun siya, bibo at sumasagot kay Jesus na tila ba he's on top of everything that's happening. Tila ba handang handa siyang mag-alay ng buhay para kay Jesus. Ngunit sa sandali ng kagipitan ay tinanggi niyang kilala niya si Jesus! Sa ating buhay, naiipit din tayo sa ilang mga pagkakataong kailangan nating sumagot sa tanong: Kristiyano ka ba? Sana "oo" ang sagot natin dito, sa lahat ng pagkakataon! Hindi pwedeng tanggalin ang pangalan ni Kristo sa ating pagkatao. Kapag walang Kristo sa isang Kristiyano, "ano" na lang ang natitira: simbolo ng pagkalito, kawalan ng Daan, Katotohanan at Buhay. Kristiyano Katoliko nga tayo, pero pagdating sa issue ng same-sex marriage, abortion, contraception at iba pang moral na usapin, kahit sa personal na lebel, nagiging "ano" na lang ang iba sa atin, itinatanggi na kilala nila si Kristo.

Sa kabila ng lahat, ang maganda sa kwento ni San Pedro ay nagsisi siya at nagbalik-loob. Alam niyang napakasaklap ng kasalanan niya. Ang Semana Santa ay isang magandang panahon para magbalik-loob, tulad ni Pedro. Sa Sakramento ng Kumpisal, hinihintay tayo ni Jesus upang magpakumbaba, kilalanin ang ating mga nagawang mali at makipag-ayos sa Kanya. Doon ay mararanasan natin at matututunan na kahit ano pang bigat ng kasalanan natin, mahal tayo ni Jesus at handa Niya tayong patawarin. Nais Niya tayong maligtas, kaya nga Siya namatay dahil doon.

Sa papalapit na Easter Triduum, inaanyayahan tayo ng Ebanghelyo ngayon na pagnilayan ang ating mga kasalanan at kawalang katapatan, talikuran ang mga ito at magbalik-loob sa Diyos sa Kanyang mga sakramento. Inaanyayahan din tayo ng Inang Simbahan na, tulad ni Juan, maging malapit kay Jesus lagi at samahan Siya sa mga darating na liturhikal na pag-alala ng Kanyang pag-aalay ng buhay para sa atin. Doon ay makikita at maririnig natin ang tibok ng Puso ni Jesus para sa atin, at malalaman natin kung gaano kamahal ang presyo ng ating kaligtasan: ang buhay ng Anak ng Diyos!